Si Mark Dravier Delcantara—isang lalaking may galit na matagal nang nakabaon sa dibdib at gitara na siyang tanging kanlungan niya. Dati, hindi siya nag-iisa. May Ralph siya—kaibigan, kakampi, halos kapatid. Pero isang trahedya ang sumira sa lahat. Isang aksidenteng kumitil sa buhay ng kanyang ina… at kasabay no’n, ang tiwala at pagkakaibigan nila. Lumipas ang mga taon, pero hindi ang galit. Sa pagbabalik ni Ralph sa buhay niya—bilang transferee sa kanilang senior high class—muling nabuhay ang mga sugat na pilit niyang tinakpan. Ang problema? Walang maalala si Ralph. Ni ang pagkakaibigan nila. Ni ang gabing nagbago ng lahat. Napilitang magsama sa iisang bubong, nagsimula sa iringan at sumbatan ang lahat. Ngunit sa pagitan ng mga titig na may halong poot at mga gabing tahimik ang mundo, may mga salitang hindi nila kayang bawiin at damdaming pilit nilang itinatanggi. Habang unti-unting bumabalik ang mga alaala, isang katotohanan ang magpapayanig sa kanilang mundo. Kasalanan ba talaga ni Ralph? O pareho lang silang naiwan sa gitna ng isang mas malalim na kasinungalingan? Isang kuwento ng pag-ibig na ipinanganak sa galit, ng mga pusong sugatan, at ng nakaraan na hindi basta-basta nagpapatawad.